Ukraynada Prezident Aparatının rəhbəri Andrey Yermakın istefa verməsi ölkədə siyasi gündəmin bir nömrəli mövzusuna çevrilib.
Musavat.com xəbər verir ki, prezident Vladimir Zelenski bu gün rəsmi fərman imzalayaraq Yermakı vəzifəsindən azad edib.
Fərman Ukraynanın rəsmi normativ-hüquqi bazasında dərc olunub və qərar 28 noyabr 2025-ci il tarixindən qüvvəyə minib. Hadisə günün əvvəlində antikorrupsiya qurumlarının Yermakın Kiyevin hökumət kvartalında yerləşən mənzilində axtarış aparması barədə açıqlama verdikdən dərhal sonra baş verib. Axtarışın hansı cinayət işi çərçivəsində aparıldığı açıqlanmasa da, Ukrayna mediası bunu yüksək ranqlı məmurlara qarşı genişlənən antikorrupsiya əməliyyatının tərkib hissəsi hesab edir.
Andrey Yermak Zelenskinin ən yaxın siyasi tərəfdaşlarından biri, uzun illər Prezident Aparatının real siyasi mərkəzi kimi tanınan fiqur idi. Onun imzası həm ABŞ və Avropa ilə koordinasiya, həm də Rusiya ilə əlaqəli danışıqların bir çox mərhələsində həlledici rol oynayıb. Bu səbəbdən Yermakın qəfil gedişi Zelenski komandasının daxilində balansın dəyişməsi kimi dəyərləndirilir. Ukraynalı politoloqların bir qismi bunu prezidentin yaxın çevrəsində genişmiqyaslı “siyasi təmizlənmə”nin başlanğıcı kimi qiymətləndirir, digərləri isə istefanın arxasında Qərbin artan təzyiqlərinin dayandığını bildirir.
Ukraynanın antikorrupsiya strukturları – NABU və SAPO – günün əvvəlində Yermakın evində keçirilən axtarış barədə təsdiqləyici məlumat versələr də, əməliyyatın detalları açıqlanmır. Yermakın özü hələlik heç bir açıqlama verməyib, Prezident Aparatı isə istefanı şərhsiz şəkildə təsdiqləməklə kifayətlənib. Siyasi analitiklər bildirirlər ki, Yermakın gedişi həm Ukrayna daxilindəki siyasi proseslərə, həm də ABŞ-la aparılan “sülh planı” müzakirələrinə təsirsiz ötüşməyəcək. Çünki Yermak uzun müddət bu danışıqlarda əsas koordinator və bir çox qərarın memarı hesab olunurdu.
Hazırda Kiyevdə kimin Prezident Aparatına rəhbər təyin ediləcəyi əsas müzakirə mövzularından biridir. Gözləntilərə görə, Zelenski yaxın günlərdə həm yeni təyinat, həm də antikorrupsiya istiqamətində növbəti qərarlar paketini elan edə bilər. Ukrayna siyasi dairələrində baş verən proseslər artıq “siyasi zəlzələ” kimi xarakterizə olunur və Yermakın istefasının bunun yalnız başlanğıcı olduğu barədə ehtimallar güclənir.
Musavat.com
