Starlink sisteminin sıradan çıxması və ya istifadəsinin məhdudlaşması Rusiya ordusunun cəbhədə rabitə imkanlarını ciddi şəkildə zəiflədib.
Musavat.com xəbər verir ki, Ukrayna müdafiə nazirinin texnoloji istiqamətlər üzrə müşaviri Sergey Beskrestnov (“Fleş”) bildirib ki, müasir müharibədə sabit internet bağlantısı olmadan effektiv idarəetmə mümkünsüzdür. Onun sözlərinə görə, rabitə kəsiləndə videoaxın dayanır, kəşfiyyat məlumatları ötürülmür, qərargahlar arasında koordinasiya pozulur.
Hazırda rus bölmələrinin alternativ kimi istifadə etdiyi əsas üsul “Wi-Fi körpüləri”dir. Bu texnologiya internet siqnalının iki anten arasında birbaşa görmə xətti ilə – yəni hava vasitəsilə ötürülməsinə əsaslanır. Antenlər əsasən qüllələrdə və ya hündür nöqtələrdə quraşdırılır.
Lakin bu sistemin ciddi zəif tərəfi var: qüllə və antenlər fiziki hədəfdir. Məlumata görə, cəbhənin bir istiqamətində belə bir qüllənin məhv edilməsi rabitənin tam sıradan çıxmasına səbəb olub. Nəticədə həmin sahədə əməliyyat koordinasiyası pozulub.
Hərbi ekspertlər qeyd edirlər ki, müasir döyüşlərdə pilotsuz uçuş aparatlarının idarəsi, artilleriya atəşinin dəqiqləşdirilməsi və bölmələrarası əlaqə birbaşa internet üzərindən həyata keçirilir. Peyk rabitəsi yerüstü sistemlərlə müqayisədə daha dayanıqlı sayılır və məhz buna görə strateji üstünlük yaradır.
Rabitə infrastrukturunun zəifləməsi isə cəbhədə operativ qərarverməni ləngidir və əməliyyatların effektivliyinə mənfi təsir göstərir. Müşahidəçilər hesab edirlər ki, alternativ texnoloji həllər tapılmasa, taktiki səviyyədə problemlər daha da dərinləşə bilər.
Musavat.com
