ABŞ prezidenti Donald Tramp Ukraynada sülh yolu ilə həll istiqamətində addımlar atmağa çalışarkən, Avropa liderləri Rusiyadan gələcək potensial təhdidlər barədə xəbərdarlıqları gücləndirirlər.
Musavat.com xəbər verir ki, bu barədə "The Wall Street Journal" nəşri məlumat yayıb.
Nəşr yazır ki, təhlükəsizlik sahəsindəki rəsmi şəxslər getdikcə daha çox cəmiyyəti Rusiya ilə mümkün müharibəyə hazırlamağa çağırır. Bir müddət öncə belə bəyanatlar ağlasığmaz sayılırdı.
Avropa paytaxtları Trampın Kiyevi əlverişsiz bir sülhə sövq edə biləcəyindən və bu da Vladimir Putini cəsarətləndirəcəyindən və Ukraynanı sonrakı hücumlara qarşı həssas hala gətirəcəyindən qorxurlar. Bundan əlavə, atəşkəs Rusiyanın resurslarını Avropaya təzyiq üçün sərbəst buraxa bilər. ABŞ-ın yenilənmiş Milli Təhlükəsizlik Strategiyasında isə Rusiya düşmən olaraq göstərilmədiyi üçün əlavə narahatlıq yaranır.
Niderlandın ehtiyatda olan admiralı Rob Bauer bildirib ki, “Avropa əgər sülhü qorumaq istəyirsə, müharibəyə hazırlaşmalıdır”, o, Rusiyanın hərbi sənayesi məhsullarının Ukraynadakı müharibənin tələblərini aşdığını qeyd edib.
Onun sözlərinə görə, bu, Avropaya qarşı təhlükənin daha sürətlə yenidən ortaya çıxacağı anlamına gələ bilər.
Eyni zamanda, Avropa siyasətçiləri ictimai dəstək toplamağın çətin olduğunu qəbul edirlər. "Gallup" sorğusu göstərib ki, yalnız avropalıların üçdə biri ölkəsi uğrunda mübarizə aparmağa hazırdır. Rəsmi şəxslər bildirirlər ki, “seçicilər hərbi xərclərin artırılmasını və hətta səfərbərliyi yalnız təhdidin real olduğuna inanarlarsa dəstəkləyəcək”.
Avropa təhlükəsizlik agentlikləri iddia edir ki, Rusiya artıq NATO-nun logistikasını pozmaq da daxil olmaqla, "boz" təxribat və casusluq kampaniyası aparır. Bu fonunda Fransa könüllü hərbi xidməti bərpa etdiyini elan edib, Almaniya genişmiqyaslı hərbi təlimlər keçirir, Böyük Britaniya isə Avropadan kənar hazırlıqları azaldaraq diqqətini Rusiyaya yönəldir. Avropadakı NATO ölkələri həmçinin müdafiə xərclərini artırmaq barədə razılığa gəliblər, lakin hərbçilər xəbərdarlıq edir ki, Rusiyanı dayandırmaq üçün bu xərcləri çox daha sürətlə artırmaq lazım olacaq.
Musavat.com
