Rusiya ilə Azərbaycan arasında ən populyar maliyyə kanallarından birinin fəaliyyətində ciddi məhdudiyyətlər yaranıb.
Musavat.com xəbər verir ki, "Zolotaya Korona" xidməti vasitəsilə Rusiyadan Azərbaycan, Qazaxıstan və Gürcüstana pul köçürmələrinin edilməsi tamamilə qeyri-mümkün olub. Hazırda sistem üzərindən onlayn köçürmələr yalnız Qırğızıstan, Türkiyə və Özbəkistan istiqamətində aktivdir.
Azərbaycanda fəaliyyət göstərən aparıcı banklardan olan "Unibank" və "Yelo Bank"dan verilən məlumata görə, onlar "Zolotaya Korona" ödəniş sistemini dəstəkləsələr də, xidmətin işində yaranan qlobal problemlər səbəbindən Azərbaycandan Rusiyaya da pul göndərmək müvəqqəti olaraq dayandırılıb.
Ölkənin digər iri maliyyə institutu "VTB Azərbaycan" isə ümumiyyətlə, sözügedən ödəniş sistemi vasitəsilə heç bir köçürmə əməliyyatı həyata keçirmədiyini bəyan edib.
Yaranan bu məhdudiyyətin nə vaxt aradan qaldırılacağı barədə hələlik rəsmi açıqlama verilməyib.
Musavat.com
