Ermənistanın baş naziri Nikol Paşinyanla Rusiya Dövlət Dumasının deputatı Konstantin Zatulin arasında qalmaqallı polemika yaşanıb.
Musavat.com xəbər verir ki, tərəflər bir-birini həm siyasi manipulyasiyada, həm də regiondakı prosesləri təhrif etməkdə ittiham ediblər.
Paşinyan Rusiya parlamentarinin Azərbaycan dövlətinin guya 5 milyard dollar ötürdüyünə dair iddialarını sərt tənqid edib. O bildirib ki, Rusiyada Ermənistanın Azərbaycan və Türkiyə ilə sülh bağlamasını istəməyən müəyyən dairələr mövcuddur. Baş nazirin sözlərinə görə, sülhün əldə olunması Ermənistanın real müstəqilliyini gücləndirəcək və məhz buna görə bəziləri münaqişənin davamında maraqlıdır.
Paşinyan eyni zamanda vurğulayıb ki, bu mövqeni bütün Rusiya rəhbərliyinə aid etmir və Vladimir Putinlə Mixail Mişustinin adını ayrıca çəkib. O, müzakirəni daxili siyasət müstəvisinə də keçirərək 2026-cı il seçkilərində erməni seçicilərinin “öz gözlərinə, yoxsa Zatulinin sözlərinə inanacaqlarını” müəyyən etməli olacağını deyib və köhnə elitaların dövrünün bitəcəyini bəyan edib.
Rusiya deputatının cavabı isə gecikməyib. Zatulin Paşinyanı məsuliyyəti yayındırmaqda ittiham edib və Moskvanın Qafqazda mövqelərini gücləndirmək üçün düşmənçilik “uydurmağa ehtiyacı olmadığını” bildirib. O, istehzalı şəkildə Ermənistan baş nazirinə Azərbaycan və Türkiyə ilə “dostluqda uğurlar” arzulayıb, 2020 və 2023-cü illərdə baş verən hadisələri xatırladıb.
Beləliklə, tərəflər arasındakı söz atışması Rusiya-Ermənistan münasibətlərində mövcud olan gərginliyin yeni mərhələyə keçdiyini göstərir və regiondakı sülh gündəliyi fonunda siyasi qarşıdurmanın davam etdiyini ortaya qoyur.
Musavat.com
