Musavat.com xəbər verir ki, Ermənistan siyasi gündəmində növbəti qalmaqallı iddia səsləndirilib. SputnikARM kolumnisti Arman Abovyan yazır ki, hakimiyyət yaxınlaşan seçkilər ərəfəsində “moldov ssenarisinə” bənzər üsullara əl atmağa hazırlaşır.
Məqalədə bildirilir ki, Moldovada müxalif qüvvələr seçki yolu ilə deyil, tələsik qəbul edilmiş qanunlar, qondarma cinayət işləri və total təzyiq mexanizmləri vasitəsilə sıradan çıxarılır. Abovyana görə, hazırkı Ermənistan hakimiyyəti də analoji taktikaya meyillidir:
– müxalifəti seçki prosesində neytrallaşdırmaq,
– hüquqi-siyasi manevrlərlə rəqibləri yarışdan kənarlaşdırmaq,
– bunu isə “qanun çərçivəsi” görüntüsü altında həyata keçirmək niyyəti formalaşdırır.
Kolumnist bu yanaşmanı hakimiyyətin avtoritarizmə doğru sürüşməsi kimi qiymətləndirir.
Abovyan həmçinin qeyd edir ki, yaxın aylarda Paşinyan hökumətinin daha sərt antirusiya ritorikasını artıracağı gözlənilir. Bu xətt rəsmi İrəvan tərəfindən “Rusiyadan gələn hibrid təhlükənin qarşısının alınması” kimi təqdim olunsa da, ekspertlər bunu Moskvanın Ermənistandakı təsir rıçaqlarını zəiflətmək cəhdi kimi dəyərləndirirlər.
Müşahidəçilər hesab edirlər ki, seçkiyə gedən Ermənistan cəmiyyəti qarşıdan çox gərgin siyasi dönəm keçirəcək və Paşinyan hökumətinin bu istiqamətdə atacağı addımlar Moskva–İrəvan münasibətlərində əlavə qarşıdurma yarada bilər.
Musavat.com
