ABŞ-ın Venesuela Prezidenti Nikolas Maduronu ələ keçirməsindən sonra artan geosiyasi gərginlik investorları təhlükəsiz "liman"lara yönəldib. Qızıl və digər qiymətli metallar həftənin ilk günündə kəskin şəkildə artıb.
Musavat.com xəbər verir ki, spot qızıl bazar ertəsi təxminən 2% artaraq son həftənin ən yüksək səviyyəsi olan 4420 dollara çatıb. Hazırda qızılın bir unsiyası 1,71% artaraq 4404 dollara satılır.
Unsiya qızılın artımı daxili bazarda da öz əksini tapıb. Qram qızıl həftənin ilk günündə 2% artaraq təxminən 242 manata çatıb. Günün sonlarında qram qızıl 1,72% artaraq 240 manata satılıb.
Faizsiz aktivlər aşağı dərəcələri və artan qeyri-müəyyənlik fonunda investorların diqqət mərkəzindədir, spot gümüş 4,1% artaraq 75,50 dollara çatıb. Gümüş 29 dekabrda 83,62 dollarlıq rekord səviyyəyə çatmışdı. Keçən ili 147% artımla başa vuran gümüş tarixdəki ən güclü göstəricilərindən birinə çatıb. Qiymətlərin artması ABŞ tərəfindən gümüşün kritik mineral kimi təyin edilməsi, artan sənaye və investisiya tələbi və təklif çatışmazlığı ilə əlaqələndirilir.
Qiymətli metalların artımı platin və palladiumda da öz əksini tapıb. Spot platin 2,54% artaraq 2198 dollara çatıb. Platin ötən bazar ertəsi rekord həddə - 2478,50 dollar olub. Palladium isə 2,13% artaraq 1668 dollara satılıb.
Musavat.com
