Rusiya Ukraynanın dron zərbələri nəticəsində yaranan yanacaq çatışmazlığını aradan qaldırmaq üçün böyük həcmdə nefti emala yönəltmək məcburiyyətində qalıb.
Musavat.com Reuters-ə istinadən xəbər verir ki, iyunda Rusiyanın qərb limanları olan Primorsk, Ust-Luqa və Novorossiyskdən xam neft daşınması may ayındakı gündəlik 2,5 milyon bareldən 1,7 milyon barelə qədər azalır.
Bu, qismən hasilatın özünün azalması ilə bağlı olsa da, yanacaq çatışmazlığının atadan qaldırılması zərurəti də mühüm rol oynayır. Bildirilir ki, emal müəssisələrinə yönəldilən gündəlik xam neft həcmi 250.000-400.000 barel artırılır.
Qeyd olunur ki, mart ayından bəri Ukraynanın liman infrastrukturuna, boru kəmərlərinə və neft emalı zavodlarına etdiyi dron hücumları Rusiyada daxili neft emalını əhəmiyyətli dərəcədə azaldıb. Bu hücumlar böhranın əsas səbəbi olub. Aprel ayında Rusiya istehsalı azaltmaq məcburiyyətində qalıb - COVID-19 pandemiyasının başlanğıcından bəri altı ildə ən böyük azalma: əvvəlki ayların orta səviyyəsi ilə müqayisədə gündə 300.000-400.000 barel və keçən ilin sonundan 500.000-600.000 barel az. May ayında Reuters mənbələri hasilatın gündə daha 100.000 barel azaldığını təxmin edir.
Baş nazirin müavini Aleksandr Novak iyunun əvvəlində istehsalın azalmasını etiraf edərək, bunu neft emalı zavodundakı "planlaşdırılmamış təmir" ilə əlaqələndirib.
May ayında Ukrayna Rusiyanın benzin istehsalının 30 faizindən çoxunu və dizel yanacağının təxminən 25 faizini təmin edən zavodların işini dayandırıb.
Bloomberg-in məlumatına görə, Ukrayna dronları əhalinin 70 faizindən çoxunun yaşadığı Rusiya ərazisinin dörddə birinə çata bilir və 1600 km-ə qədər zərbə məsafəsinə malikdir.
Nəticələr artıq işğal olunmuş Krımda hiss olunur: neft anbarlarına müntəzəm zərbələr səbəbindən benzinə ciddi məhdudiyyətlər və kuponlar tətbiq edilib.
Musavat.com
