Rusiya Federasiya Şurası ölkə hüdudlarından kənarda yaşayan və "Rusiyanın maraqlarını pozmaqda" ittiham edilən vətəndaşlar üçün xüsusi reyestrin yaradılmasını nəzərdə tutan qanunu təsdiqləyib.
Musavat.com xəbər verir ki, qanun bundan əvvəl Dövlət Duması tərəfindən "Vahid Rusiya" və "Yeni İnsanlar" partiyalarının dəstəyi ilə qəbul edilmişdi. Sənəd prezident tərəfindən imzalandıqdan sonra qüvvəyə minəcək.
Yeni qanuna əsasən, reyestrə daxil edilən şəxslərə qarşı bir sıra ciddi məhdudiyyətlər tətbiq oluna bilər. Bunlara dövlət, bank və konsulluq xidmətlərindən istifadə imkanlarının məhdudlaşdırılması, Rusiyada biznes idarə etmək hüququnun məhdudlaşdırılması, əmlak və miras üzərində sərəncam vermə prosesində çətinliklərin yaradılması daxildir.
Qanun layihəsinin müəllifləri bildirirlər ki, məqsəd xaricdə fəaliyyət göstərərək Rusiyanın təhlükəsizliyinə və milli maraqlarına zərər vurduğu hesab edilən şəxslərə qarşı hüquqi mexanizm yaratmaqdır.
Bununla yanaşı, hüquq müdafiəçiləri və müxalifət nümayəndələri hesab edirlər ki, yeni mexanizm hakimiyyət tərəfindən müharibəyə qarşı çıxan və ya Kremlin siyasətini açıq tənqid edən Rusiya vətəndaşlarına təzyiq vasitəsinə çevrilə bilər. İctimai müzakirələrdə təşəbbüs artıq qeyri-rəsmi olaraq "xalq düşmənləri siyahısı" kimi də xarakterizə olunur. Qanun prezident tərəfindən imzalandıqdan sonra hökumət müvafiq reyestrin formalaşdırılmasına başlayacaq və sənəddə nəzərdə tutulan məhdudiyyətlərin tətbiqi mümkün olacaq.
Qanun Rusiyanın xaricdə yaşayan vətəndaşları üzərində nəzarət imkanlarını daha da genişləndirən addım kimi qiymətləndirilir. Rəsmi Moskva bunu milli təhlükəsizliyin qorunması ilə əsaslandırsa da, tənqidçilər hesab edirlər ki, meyarların qeyri-müəyyən olması reyestrin siyasi məqsədlərlə istifadə olunması riskini artırır. Bu səbəbdən sənəd həm ölkə daxilində, həm də beynəlxalq aləmdə insan hüquqları və ifadə azadlığı baxımından müzakirələrə səbəb olub. Rusiyada yüz minlərlə Azərbaycan əsilli şəxs və Azərbaycan vətəndaşı yaşayır. Əgər onların arasında Rusiya vətəndaşlığı olan, lakin xaricdə yaşayan şəxslər bu reyestrə salınarsa, bank hesabları, əmlakı və biznes fəaliyyəti ilə bağlı problemlərlə üzləşə bilərlər. Azərbaycanda və ya üçüncü ölkələrdə yaşayan, Rusiya vətəndaşı olan jurnalistlər, blogerlər və fəallar da bu qanunun potensial təsir dairəsinə düşə bilərlər.
Musavat.com
