Venesuelada siyasi-hərbi böhranın dərinləşməsi fonunda hakimiyyətin əsas dayaqlarından sayılan silahlı mülki dəstələr – kollektivlər ölkənin bir sıra bölgələrində, o cümlədən Araqua ştatında və paytaxt Karakasın mərkəzində yerləşdirilib.
Musavat.com xəbər verir ki, dünən axşam saatlarından etibarən paytaxtın strateji ərazilərində silahlı mülki qrupların aktivliyi açıq şəkildə müşahidə olunub.
Məlumata görə, Karakasda hökumət binalarının, nəqliyyat qovşaqlarının və inzibati mərkəzlərin ətrafında silahlı şəxslər yerləşdirilib. Hakimiyyət bu qrupları rəsmi şəkildə “xalq müdafiə qüvvələri” kimi təqdim etsə də, müxalifət və beynəlxalq hüquq-müdafiə təşkilatları kollektivləri rejimin qeyri-rəsmi silahlı aləti kimi qiymətləndirir.
Bildirilir ki, kollektivlər əsasən motosikletlərlə hərəkət edir, avtomatik silahlarla təchiz olunub və hüquq-mühafizə orqanları ilə koordinasiyalı fəaliyyət göstərirlər. Onların küçələrdə görünməsi paytaxt sakinləri arasında ciddi narahatlıq yaradıb.
Nə baş verir?
Araqua, Miranda və Karakas daxil olmaqla bir neçə regionda silahlı mülki dəstələrin yerləşdirilməsi qeydə alınıb;
Paytaxtın mərkəzində patrul və nəzarət postları qurulub;
Hakimiyyət bunu “təhlükəsizliyin təmin edilməsi” ilə əsaslandırsa da, müxalifət bu addımların mümkün kütləvi etirazların qarşısını almaq məqsədi daşıdığını bildirir.
Musavat.com
