Ermənistan parlamentinin spikeri Alen Simonyan ölkə daxilində yeni qalmaqal yaradacaq açıqlamalarla çıxış edib.
Musavat.com xəbər verir ki, o, Ermənistan Apostol Kilsəsinin rəhbərliyini xarici – xüsusilə Rusiya xüsusi xidmət orqanlarına xidmət etməkdə ittiham edib.
Simonyan bildirib ki, söhbət kilsəyə qarşı mübarizədən yox, “kilsə adı altında şəxsi və xarici maraqlara işləyən şəxslərdən” gedir:
“Bəziləri respublikadan kənardakı maraqlara, şəxsi maliyyə və intim maraqlara xidmət edir.”
“Qara rasanın arxasında gizlənmək olmaz”
Spiker iddia edib ki, yüksək vəzifəli ruhani şəxslərlə bağlı ağır cinayət şübhələri mövcuddur. Onun sözlərinə görə, pedofiliya ittihamları hüquq-mühafizə orqanları tərəfindən araşdırılarsa, bunu kilsəyə hücum kimi təqdim etmək olmaz:
“Qara rasanın arxasında gizlənib hər şeyə icazə verildiyini düşünmək olmaz.”
O əlavə edib ki, 4-5 yüksək rütbəli kilsə nümayəndəsi belə qalmaqallara qarışıb.
“Katolikosun qardaşı Rusiya kəşfiyyatına işləyir”
Simonyanın ən sərt iddiası isə Ermənistan Apostol Kilsəsinin rəhbərliyinə qarşı olub. O deyib ki, özünü katolikos kimi təqdim edən şəxsin qardaşının Rusiya xarici kəşfiyyatı ilə əməkdaşlığını təsdiqləyən sənəd mövcuddur.
Bundan başqa, spikerə görə, kilsə daxilində də parçalanma yaranıb — bəzi yüksək rütbəli ruhanilər həmin şəxslərə qarşı çıxıb, lakin onlar vəzifədən uzaqlaşdırılıb: “Hakimiyyəti bir neçə nəfər zəbt edib, hətta qərarların qəbul edildiyi iclasları keçirmək üçün kvorumları belə yoxdur.”
Ermənistanda yeni qarşıdurma mərhələsi
Bu açıqlamalar İrəvanda hakimiyyət-kilsə münasibətlərini daha da gərginləşdirə bilər.
Analitiklər hesab edir ki, mövzu təkcə dini deyil, həm də geosiyasi xarakter daşıyır və Rusiya-Ermənistan münasibətlərində yeni gərginlik siqnalı kimi qiymətləndirilir.
Musavat.com
