Rusiya Prezidentinin köməkçisi Yuri Uşakov Ukrayna və Avropa tərəfinin sülh planına təklif etdiyi dəyişikliklərin real razılaşmaya yaxınlaşdırmadığını bəyan edib.
Musavat.com xəbər verir ki, Uşakovun sözlərinə görə, edilən korrektələr danışıqlar prosesinə konstruktiv töhfə vermir və mövqelər arasında məsafəni azaltmır.
Kreml rəsmisi digər açıqlamalarında da diqqətçəkən məqamları dilə gətirib. Uşakov bildirib ki, Prezidentin nümayəndəsi Kirill Dmitriyev hazırda Mayamidə amerikalı tərəfdaşlarla danışıqlar aparır və geri qayıtdıqdan sonra nəticələr barədə məruzə edəcək. Musavat.com qeyd edir ki, bu təmaslar Rusiya–ABŞ xəttində mümkün dialoq kanallarının saxlanıldığını göstərir.
Bununla yanaşı, Uşakov üçtərəfli — Rusiya, ABŞ və Ukrayna ekspertlərinin iştirakı ilə görüş təşəbbüsü barədə yayılan iddiaları da təkzib edib. Onun sözlərinə görə, belə bir təşəbbüs ciddi səviyyədə müzakirə olunmayıb. Musavat.com bildirir ki, Kreml bu mərhələdə format və mexanizmlərlə bağlı spekulyasiyaların əsassız olduğunu vurğulayır.
Musavat.com
