Bişkek uzun illər paytaxtın ən ağrılı problemlərindən biri sayılan nəhəng tullantı poliqonu ilə vidalaşmaq üzrədir.
Musavat.com xəbər verir ki, Qırğızıstan paytaxtında zibillik kimi tanınan ərazi mərhələli şəkildə ləğv edilərək müasir tullantı emalı və enerji istehsalı zonasına çevrilib.
Məlumata görə, illər boyu minlərlə ton məişət tullantısının yığıldığı sahə həm ekoloji, həm də sosial baxımdan ciddi təhlükə yaradırdı. Kəskin qoxu, yeraltı suların çirklənməsi, yanğın riski və ətraf yaşayış massivlərinə təsir Bişkeki faktiki olaraq ekoloji böhran həddinə gətirmişdi.
Son mərhələdə şəhər rəhbərliyi köklü qərar qəbul edərək zibilliyin yerində tullantıdan enerji istehsal edən müasir kompleksin yaradılmasına start verib. Yeni sistem çərçivəsində məişət tullantıları çeşidlənir, zərərsizləşdirilir və elektrik enerjisi istehsalında istifadə olunur. Bununla yanaşı, poliqonun bir hissəsi tam bağlanaraq yaşıllaşdırılıb və şəhər infrastrukturu üçün yeni imkanlar yaradılıb.
Bu addım Bişkeki regionda ekoloji transformasiya nümunəsinə çevirir. Bir vaxtlar şəhərin “qara ləkəsi” sayılan zibillik indi dayanıqlı inkişaf, təmiz enerji və müasir urbanistika modelinin bir hissəsi kimi təqdim olunur.
Bişkekin bu təcrübəsi postsovet məkanının bəzi ölkələrində uzun illər həll olunmayan tullantı problemi ilə bağlı real çıxış yolunun mövcud olduğunu göstərir: zibillik yox, resurs kimi yanaşma.
Musavat.com
