Milli Məclisin sədri Sahibə Qafarova iyulun 16-da ölkəmizdə səfərdə olan Fələstin Dövlətinin baş naziri Məhəmməd Mustafa ilə görüşüb.
Musavat.com Milli Məclisin Mətbuat və ictimaiyyətlə əlaqələr şöbəsinə istinadən bildirir ki, görüşdə Azərbaycan ilə Fələstin arasında dostluq münasibətlərindən və qarşılıqlı hörmətə əsaslanan əməkdaşlıqdan bəhs edən parlamentin spikeri qeyd edib ki, ölkələrimizi ortaq dini-mənəvi və ailə dəyərləri, habelə xalqlarımız arasında mövcud olan dostluq münasibətləri birləşdirir. Dövlətlərarası əlaqələrin dərinləşməsində yüksək səviyyəli səfərlərin, eləcə də keçirilən görüşlərin mühüm rolunu vurğulayan Milli Məclisin sədri, Fələstin Baş nazirinin ölkəmizə cari səfərinin iki ölkə arasında münasibətlərin daha da inkişafına və əməkdaşlığın genişlənməsinə mühüm töhfə verəcəyinə əminliyini ifadə edib.
Spiker Sahibə Qafarova Azərbaycanın Fələstin məsələsində prinsipial mövqe tutduğunu qeyd edərək, bu mövqeyin beynəlxalq təşkilatlar çərçivəsində də ardıcıl şəkildə izləndiyini vurğulayıb.
Söhbət zamanı 2023-cü ildə Azərbaycanın Ramallah şəhərində Təmsilçilik Ofisinin fəaliyyətə başlamasının ikitərəfli münasibətlərin inkişafında mühüm addım olduğu vurğulanıb. Parlamentin sədri xatırladıb ki, 2022-ci ilin noyabr ayında Milli Məclis bu Ofisin təsis edilməsi haqqında qanunu yekdilliklə qəbul edib.
Parlamentlərarası əməkdaşlığın əhəmiyyətinə toxunan Sahibə Qafarova qeyd edib ki, Azərbaycan parlamenti Fələstin Milli Şurası ilə həm ikitərəfli formatda, həm də Parlamentlərarası İttifaq, İƏT Parlament İttifaqı (PUIC), Asiya Parlament Assambleyası və Qoşulmama Hərəkatı Parlament Şəbəkəsi çərçivəsində səmərəli əməkdaşlıq edir. Diqqətə çatdırılıb ki, Azərbaycan beynəlxalq təşkilatlar və digər çoxtərəfli platformalar çərçivəsində Fələstin məsələsini daim diqqət mərkəzində saxlayır və bu məsələyə xüsusi həssaslıqla yanaşır.
Görüşdə humanitar, xüsusilə təhsil və mədəniyyət sahələrində əməkdaşlıq imkanları da müzakirə olunub. Azərbaycanda fələstinli tələbələrin təhsil almasından məmnunluq ifadə edilərək, "Heydər Əliyev Beynəlxalq Təhsil Qrantı" proqramının onlara yaratdığı əlverişli imkanlar yüksək qiymətləndirilib.
Fələstin Dövlətinin Baş naziri Məhəmməd Mustafa Azərbaycan dövlətinə, xalqına və parlamentinə Fələstin məsələsində göstərilən ardıcıl siyasi, diplomatik, humanitar dəstəyə görə təşəkkür edib. Azərbaycan Prezidenti və Baş naziri ilə keçirdiyi görüşlərin əhəmiyyətini qeyd edən qonaq, ölkə rəhbərliyinin davamlı dəstəyinin Fələstin xalqı tərəfindən heç vaxt unudulmayacağını vurğulayıb. Baş nazir, həmçinin Azərbaycanın beynəlxalq sülh təşəbbüslərinə töhfəsini yüksək qiymətləndirərək, ölkəsinin "iki dövlət" prinsipi əsasında ədalətli və davamlı sülhə sadiq olduğunu bildirib.
Məhəmməd Mustafa iki ölkə arasında kənd təsərrüfatı, təhsil və humanitar sahələrdə əməkdaşlığı genişləndirmək üçün böyük potensialın olduğunu diqqətə çatdırıb. Bu çərçivədə o, Azərbaycanın dəstəyi ilə Fələstində məktəb tikintisini və digər birgə layihələri xüsusi qeyd edib. Parlamentlərarası əməkdaşlığın inkişafına xüsusi önəm verdiyini bildirən Baş nazir, bu əməkdaşlığın müxtəlif istiqamətlər üzrə daha da genişləndirilməsinin vacibliyini vurğulayıb.
Sonda Azərbaycandakı sürətli inkişaf və quruculuq işlərindən heyranlığını ifadə edən qonaq, Azərbaycan xalqına sülh, firavanlıq və uğurlar arzulayıb.
Yazı dərc olunarkən Fələstin baş nazirinin Azərbaycan Prezidenti və Baş nazir Əli Əsədovla görüşdüyü barədə də məlumat yayıldı.
Bu səfər və qarşılıqlı şəkildə ifadə olunan səmimi münasibətlərdən sonra Fələstin mövzusu ilə bağlı spekulyasiyalara, bəzən Azəbaycan əleyhinə envanlanan yersiz iddialara son qoyulacaqmı? Görüşü necə dəyərləndirmək olar?
Milli Məclisdə keçirilən qəbulda kştirak edən deputat Ceyhun Məmmədov Musavat.com-a açıqlamasında bildirdi ki, Azərbaycan xalqı və dövləti hər zaman Fələstin xalqının yanında olub, dost və qardaş dəstəyini əsirgəməyib: “Rəsmi Bakı BMT - nin qərarına əsasən, iki dövlətin qurulması prinsipini dəstəkləyir. Bu gün Azərbaycanın Fələstində nümayəndəliyi fəaliyyət göstərir. Azərbaycan Fələstində məktəb tikir. Ölkəmiz davamlı olaraq Fələstin xalqına humanitar yardım göstərir. Fələstinin Baş nazirinin ölkəmizə səfəri, Prezident İlham Əliyev, Baş nazir Əli Əsədov və Milli Məclisin sədri Sahiba Qafarova tərəfindən qəbul olunması, aparılan müzakirələr əlaqələrin inkişafına töhfə verəcək. Azərbaycan müsəlman dünyasının bir parçası kimi, hər zaman müsəlman dünyası ilə həmrəylik nümayiş etdirib. İslam Əməkdaşlıq Təşkilatının fəal üzvü kimi müsəlman dünyasının həmrəyliyi üçün ciddi səylər göstərir”. C.Məmmədov əlavə etdi ki, Fələstin xalqı Prezident İlham Əliyevin bu qardaş dəstəyini yüksək qiymətləndirir: “Növbəti mərhələdə əlaqələrimiz daha da güclənəcək və inkişaf edəcək. Bunun üçün çox ciddi səylər və əsaslar var”.
E.Paşasoy,
Musavat.com
