Ermənistan hökuməti TRIPP layihəsi üzrə beynəlxalq müqavilədə təsbit olunmuş öhdəliklərin Konstitusiyaya uyğun olub-olmadığını müəyyən etmək üçün Konstitusiya Məhkəməsinə müraciət edəcək. Musavat.com erməni mediasına istinadən bildirir ki, iyulun 16-da Nazirlər Kabinetinin iclasında “Beynəlxalq sülh və firavanlığa Tramp marşrutu” (TRIPP) layihəsi ilə bağlı Ermənistan və ABŞ arasında strateji əməkdaşlıq haqqında Çərçivə Sazişinin ratifikasiyası haqqında qanun layihəsi təsdiq edilib.
Əgər Konstitusiya Məhkəməsi beynəlxalq müqavilədə təsbit edilmiş öhdəliklərin Konstitusiyaya uyğunluğunu təsdiq edən qərar qəbul edərsə, Hökumətin qanunvericilik təşəbbüsü müəyyən edilmiş qaydada ratifikasiya üçün Milli Məclisə təqdim olunacaq.
Ermənistan Respublikası xarici işlər nazirinin müavini Vahan Kostanyan Nazirlər Kabinetinin Konstitusiya Məhkəməsindəki nümayəndəsi təyin edilib. O, “Konstitusiya Məhkəməsi haqqında” Konstitusiya Qanununa əsasən, tərəfə verilən bütün hüquqlarla təmin olunub. Ermənistanın xarici işlər naziri Ararat Mirzoyan bəyan edib ki, layihənin sənədləşməsinin yekunlaşdırılması üçün səhmdarlar arasında saziş və layihənin icrasına cavabdeh olan şirkətin nizamnaməsi imzalanmalıdır.
Onun sözlərinə görə, Ermənistan və ABŞ Cənubi Qafqazda nəqliyyat əlaqələrini inkişaf etdirməyi, nəqliyyat infrastrukturunu, həmçinin qlobal və regional ticarəti irəli aparmağı, eləcə də regionda bərqərar olmuş sülhü möhkəmləndirməyi hədəfləyirlər.
O əlavə etdi ki, layihə Ermənistanın suverenliyinə, ərazi bütövlüyünə və yurisdiksiyasına – o cümlədən sərhəd nəzarəti məsələlərinə – tam hörmət edilməklə həyata keçirilir.
Nazir qeyd edib ki, layihə çərçivəsində ABŞ və Ermənistan, ölkənin müxtəlif bölgələrində konkret layihələri icra etmək üçün müxtəlif tərəfdaşları cəlb etmək imkanına malik bir şirkət təsis edirlər. “Layihənin 49 illik müddəti başa çatdıqdan sonra tərəflər onu eyni müddətə uzada biləcəklər. Bu halda
Ermənistanın şirkətdəki payı 26%-dən 49%-ə yüksələcək", - deyə Mirzoyan qeyd edib.
O vurğulayıb ki, TRIPP layihəsinə xidmət göstərmək məqsədilə TRIPP+ adlı şirkət yaradılır. Onun sözlərinə görə, TRIPP+ şirkəti TRIPP layihəsi üçün investisiya cəlb edilməsinə cavabdeh olacaq.
Musavat.com
