Rusiyanın Tümen vilayətində yerləşən və ölkənin ən iri özəl neft emalı müəssisələrindən biri sayılan Antipinski Neft Emalı Zavodunda güclü yanğın baş verib.
Musavat.com xəbər verir ki, səhər saatlarında başlayan yanğının söndürülməsi üçün hadisə yerinə çoxlu sayda yanğınsöndürmə briqadası və xüsusi texnika cəlb olunub. Müəssisənin strateji əhəmiyyəti nəzərə alınaraq hadisə yerində dərhal yüksək dərəcəli hazırlıq elan edilib.
Qeyd edək ki, Antipinski zavodu Rusiya iqtisadiyyatı və daxili yanacaq bazarı üçün kritik əhəmiyyətə malik ən böyük sənaye obyektlərindən biridir. Zavodun illik layihə gücü 9 milyon tondan çox xam neft təşkil edir.
Rusiya Federasiyasının daxili bazarını əsaslı şəkildə təmin edən bu nəhəng müəssisədə yüksəkkeyfiyyətli benzin, dizel yanacağı və digər mühüm neft məhsulları istehsal olunur. Hazırda yanğının hansı səbəbdən baş verdiyi və zavodun fəaliyyətinə vurduğu ziyanın miqyası araşdırılır.
Musavat.com
